Okkar frábæra Teigskona og stuðbolti Unnur Halldórsdóttir hefur samið brag fyrir félagsmenn, til að fara með í gleðskap og mannamótum. Hann er birtur hér svo allir geti lært hann og æft sig og verið vel undirbúnir þegar kallið kemur:

Lag: Flagarabragur (Ég kátur stunda kvennafar). Texti: Unnur Halldórsdóttir

Er haustlægðirnar æsa sig og andskotast á Fróni

er ágætt ráð að drífa sig og forða heilsutjóni.

Á Spáni er gott að una sér á eðalgóðum degi,

og ekki er verra að leika sér með félögum í Teigi.

Viðlag:

Einn, tveir, í golfinu er gaman

að geta farið út á völl og leikið okkur saman.

Á Vistabella á mánudögum ferðum ekki fækkar,

og fljótt hjá okkur öllum þar

……forgjöfin svo lækkar.

Á „ Þriðju“ alltaf langar mig að leika undir pari,

en líklegt er að boltinn þó í vatnið bara fari.

Á „Sjöttu“ má svo vænta þess að skorið fari að skána

( ég skrái ekki höggið sem ég sló í stórutána)

Viðlag:

Einn, tveir, í golfinu er gaman,

að geta farið út á völl og leikið okkur saman.

Þó stundum sé nú vindurinn á Vistabella ærinn,

við vitum að í mótlæti

……….oft skapast bestu færin.

Vorferðin til Mojacar er meiriháttar gleði,

þó margir eigi á „Tíundu“ í ansi miklu streði.

Á barnum fyrir kvöldverðinn má kokteilana smakka,

já, klárlega allt skipulag skal mótsnefndinni þakka.

Viðlag:

Einn, tveir, í golfinu er gaman

að geta farið út á völl og leikið okkur saman.

Brekkurnar í Mojacar af öryggi við ökum

en andköfin í beygjunum

………við stelpurnar þó tökum.

Já, saman hér í golfinu við strengi skulum stilla

og stöðugt okkar lífsbikar af gleðisafa fylla.

Í lokavísu hæfir vel að leggja það til mála

að lyfti allir glasi hér, já, nú er rétt að skála!!!!!

Viðlag:

Einn, tveir, í golfinu er gaman

að geta farið út á völl og leikið okkur saman.

Það er ekki undarlegt þó allir hérna segi:

Afskaplega er skemmtilegt

að vera í klúbbnum Teigi.